Beysenbi, 18 Qañtar 2018
Dep jatır 1950 14 pikir 8 Qañtar, 2018 sağat 10:29

Köpen Ämirbek. Şın önerdi qorlağan serialdı qorğauğa bola ma?   

«Bayan Swlu" serialı - senimsiz, jasandı, halıqqa körsetetindey deñgeyde emes»

Qazaqtıñ körnekti satira sardarı, Qazaqstannıñ eñbek siñirgen qayratkeri Köpen Ämirbek Wlttıq arnadan körsetilip, ülken dauğa aynalğan "Qozı Körpeş - Bayan Swlu" serialına qatıstı öz pikirin osılay jetkizdi, - dep habarlaydı "Qazaq üni" wlttıq portalınıñ tilşisi.

- Bizdiñ qazaq kinosı tarihında däl osı "Bayan Swlu" serialınday dau-damay tuğızğan serial bolğan joq. Nege? Bwl janjal qaydan şıqtı? Negizgi sınşı halıq emes pe? Halıq - elek. Önerdi - bir qap wn dep qaraytın bolsaq, wnıñdı ilegende keregi bir jaqta, kebegi bir jaqta qalmay ma? Osı serialdı elekten ötkizsek, bwnıñ keregi şamalı, kebegi köp dünie. Sondıqtan da, köpşilik köñilinen şıqpağannan keyin narazı.

"Halıq wyğarsa, han tüyesin soyadı" degen atalı söz bar. Osı serialdıñ aynalasında ter tökpese de, eñbektengenderge, olardıñ şaşbauın kötergenderge aytarım - şın önerdi qorlauğa bolmaydı!

Qazaq halqı bağzıdan beri öziniñ salt-sanasın, ädet-ğwrpın saqtap kelu arqılı qazaq bolıp kele jatqan joq pa? Serialdı tüsiruşiler ädebietimizdiñ altın qorına aynalğan wlı dastanımızdı alıp şığa almağan. Jibektey düniemizdi jwlmalap jün-jırğasın şığarğan. Ärqaysısınıñ röline jeke-jeke toqtaluğa bolar edi, onı artıq sanap otırmın. Sebebi, jalpı alğanda serial jasandı, senimsiz, halıqqa körsetetindey deñgeyde emes.

Al, endi bireuler şığıp "oybay, ol jırdıñ bälenbay nwsqası bar" dep jatır.  Meyli, qanşa nwsqası bolsa da, halıqtıñ jüreginde, kökireginde "Qozı-Körpeş - Bayan-Swlu" jırı şolpan jwldızday bir ğana nwsqada jarqırap twr. Bwlar sonı jarqırata almadı. Onıñ nesin qorğaydı? Ömirde eki närse bar: biri - qorğau, ekinşisi - qorlau. Jartı ğasır bwrın tüsirilgen "Taqiyalı perişte" men "Qız Jibekti" qarañızşı. Qanday körkem dünie! Al, Bayan Esentaevanıñ mına serialın öziniñ jaqtastarı men jaqındarınan basqa jaqtap, qolpaştap otırğan adamdı körmedim.

Biz prodyuserdiñ müddesin emes, eldiñ, közi aşıq körermenniñ müddesin oylauımız kerek. Eldiñ müddesi - memlekettiñ müddesi. Memleket müddesi men Menmendik müdde degen ekeui eki türli. Bizdi qwrtatın osı menmendik müdde. Atım şıqqan dep, osılay jasauğa bola ma?

El auzında mınanday äfsana bar: "Qotır eşki aytqan eken: "Meni kim soysa da, qasapşı soysa eken" degen. Bwlar qazaq kinosınıñ qasapşısı da bola almadı.

Qazaqta "twşımdı" degen wğım bar. Şegen qwdıqtıñ suınan artıq su joq. Al, qazir "Koka-kola" sekildi ber jağı jıltırap twrğan, ar jağı meyiriñdi qandırmaytın qwr tätti su köp. Onımen halıqtıñ meyirin qandıra almaysıñ. Bwlar sol "Koka-kola" sekildiler ğoy.

Abai.kz

 

14 pikir