Düysenbi, 19 Aqpan 2018
Adasqandar 1315 4 pikir 9 Qañtar, 2018 sağat 13:11

Elbasıdan "keşirim swraudı" üyren, şeneunik!

Osığan deyin paraqorlıqpen häm qızmetin asıra paydalanıp isti bolğan qanşama şeneunik Elbasıdan keşirim swradı. Olardıñ talayı bostandıqqa şıqtı. Keybiri tipti, artqan senimdi de aqtamadı. Keşe ğana "şetelde oqıdı dep äspettegen", "Bolaşaqpen" oqıp kelip, bolaşağın abaqtığa kürmep qoyğan bwrınğı Wlttıq ekonomika ministri Quandıq Bişimbaev QR Prezidenti Nwrswltan Nazarbaevten keşirim swradı. "Bwqağa tuğan kün bwzauğa da tuarın" eskerip, keşirim swrağıştardıñ birqatarınıñ sözderin osında jariyalaudı jön sanadıq. Maylı kresloda otırğan är ağayın, sözderin jwptap, dayındıq jasay jürsin! 

Quandıq Bişimbaev, Bwrınğı Wlttıq ekonomika ministri:

– Barlıq jetistikterim memleket basşısınıñ arqasında. "Samwrıqta", "Bäyterekte", ministrlikte, qayda jwmıs istesem de memleket basşısı bergen tapsırmalardı orındauğa tırıstım. Men siyaqtı jas azamatqa senip, oğan jäne elge qızmet etuge mümkindik bergeni üşin prezidentke şeksiz alğıs aytamın. Prezidenttiñ aldında kinäli ekenimdi bilemin. Özim jwmısqa şaqırğan Jaqsıbaev, Jaqıpov jäne basqalar mağan kesirin tigizdi. Kadrlardı tañdau kezinde qattı qatelestim. Adamdardı özime jaqındattım. Olar senimime kirip, meni paydalanıp ketti. Prezidentten keşirim swraymın, halıqtan osı üşin keşirim swraymın.

Serik Ahmetov, bwrınğı ükimetbası:

– Nazarbaevtıñ ümitin aqtay almağanım üşin keşirim swraymın. Qarağandı oblısındağı qazirgi uaqıtta qalıptasqan ahualğa birden-bir jauaptı ekenimdi jaqsı tüsinemin. Osı üşin de Memleket basşısı köp oylandı jäne köp uayımdadı.

Eger sot jäne Memleket basşısı mağan qatarğa qosıluğa mümkindik berse, öz tarapımnan memleket müddesi üşin bar bilimim men täjiribemdi jwmsauğa äzirmin jäne osı arqılı özimniñ adal atımdı qaytarğım keledi. Qalay bolğan künniñ özinde men memleketime, halqıma jäne wlt liderine adal bolıp qalamın.

Bauırjan ÄbdişevQarağandı oblısınıñeks-äkimi:

– Ömir boyı adal qızmet ettim. Köpbalalı otbasında ömirge keldim. Äke-şeşem qarapayım jwmısşılar-tın. Otbasımızdağı bastı qwndılıqtıñ atı – eñbek edi. Osınıñ arqasında östim. Elbasınıñ arqasında jauaptı memlekettik isti atqardım. Uaqıt öte halıq men atqarğan jwmıstıñ ädil bağasın bere jatar. Eşqaşan öz müddemdi oylağan emespin. Oblıstıñ mäselesin şeşerde zañ jüzinde äreket ettim. Odan attağam joq…

Qarağandı oblısın basqaru – ülken jauapkerşilik. Prezident öziniñ sayasi jäne eñbek jolın däl osı öñirden bastağan. Mwnı eşqaşan wmıtqan emespin. Qılmıstıq jospar qwru, qızmetimdi asıra paydalanu, käsipkerlerge kedergi keltiru meniñ oyımda da joq edi. Men Prezidenttiñ adal sarbazımın. Prezidentke jäne halıqqa adal qızmet ettim. Mağan bireuler ädeyi qastandıq jasadı, osı sebepti de Nazarbaevten keşirim swraymın.

Erlan Arın, Pavlodar oblısınıñ eks-äkimi:

– Memlekettik qızmetkerdiñ atına kir keltirgem joq, osı sebepti qazir osı arada otıru mağan öte auır. Elimizdegi eñ iri öñirdiñ birine basşılıq etken meni ayıptı sanauda. Men Prezidenttiñ, Elbası Nwrswltan Nazarbaevtıñ senimdi adamımın.

Prezidenttiñ ümitin aqtay almadım. Däl osı arada Memleket basşısınan keşirim swrağım keledi. 1991 jıldan men Prezidenttiñ barlıq reformasın qoldap kelemin jäne ärdayım sonıñ komandasında boldım. Memleket basşısınıñ senimdi adamdarınıñ qatarında bolu änşeyin ol qoyıp ketken qızmette otıru emes. Käsibi maman bolu, eliñdi süyu, adal qızmet atqaru. Bwl twrğıda men tağdırımnıñ qalay şeşilerine qaramay, özimdi äli de bolsa Elbasınıñ komandasındağı adammın dep sanaymın.

 

Mwrat Ospanov, Tabiği monopoliyalardı retteu agenttiginiñ eks-törağası:

 – Men eşqaşan para alğan emespin. Tarifti köterui üşin «Atırau Jarıq» käsipornınan 300 mıñ dollar talap etkenim ötirik. Sondıqtan mağan tağılğan kinäni moyındamaymın. Tek tım sengişpin, soğan ökinemin. Qızımnıñ toyı ötetin edi. Soğan älgi aqşanı qarızğa swrağanmın… Mwnıñ bäri meniñ bet-bedelime daq tüsirdi. El meni «jemqor» dep oylaydı. Odan bwrın mağan ülken ümit artqan Prezidenttiñ senimin aqtay almadım. Ökinemin. Qattı ökinemin». 

Tüyin

Elbasıdan keşirim swrağan şeneunikter bwlarmen şektelmeydi. Kedendik baqılau komitetiniñ törağası bolğan Serik Baymağanbetov, Energetika, industriya jäne sauda ministri bolğan Mwhtar Äblyazov, Densaulıq saqtau ministrliginiñ eks-basşısı Jaqsılıq Dosqaliev, t.b şendiler Elbasınıñ aldında bas iip, qol qusırğan-dı. Onıñ biri de elden, qazaq halqınan keşeuil ötingen joq.

Halıq  – Qwdaydıñ bir atı. Osını da wmıtpasa eken şeneunikter!

Şäriphan Qaysar

Abai.kz

 

 

 

 

 

4 pikir