Särsenbi, 17 Qañtar 2018
Deja vyu 1249 12 pikir 9 Qañtar, 2018 sağat 17:21

Sanasına saytan sarığan Sal'eriler ortamızda äli de bar...

Bwl teatrdıñ tarihın aytıp jatudıñ qajeti joq. Käsibi teatrdıñ negizin qalağan sahna sañlaqtarı eñbek etken, soñğı eki jılda älemniñ alpauıt elderinde öner körsetip jürgen qasietti qara şañıraq. Bwl kezeñ –teatr wjımınıñ birlese otırıp, talay asulardı bağındıruğa dayın kezi dep oylaymın. Biz, eski közder, artımızdan ergen ini-qarındastardıñ, jastardıñ qanday ekenin bağalauğa şamamız keledi. Men talay jerde teatrımızdıñ bügingi küni jaqsı bağıtta, bilikti basşılıqpen ıntımaq-birlikte qazaq önerine qızmet etip jürgenin maqtanışpen aytıp jürdim. Osı jasqa kelgende, şındıqtı men  aytpasam kim aytadı?! Mendegi qalğanı tek qana tazalıq. Jaltaratın jasta emespin. Keşegi bolğan jağday, barşamızdıñ janımızğa qattı battı...

Erlannıñ qanday adal azamat ekenin men emes, halıq aytadı. Osı wjımnıñ 99 payızı osı jağdaydı estigeli jügirip jür. Äsirese, jastar Erlandı qorğap-qoldap, janınan tabılıp, jaqsı sözderin ayap jatqan joq.

Örkenietti elderde para beruşini de zañ aldında jauapqa tartadı! Sondıqtan, para beruşini de sottau kerek. ...Sanasına saytan sarığan Sal'eriler ortamızda äli de bar...  Önerdi, öner üşin tuğan örendi satu – Otanın satu!   Sebebi, Otanın satqan adam, bärin de satadı. Sondıqtan, men osını wyımdastırğan bäzbireulerdi de sotqa şaqıramın!

Erlan – köz aldımızda qazaq önerine qızmet etip keldi. Äli de qıruar şaruanı atqaradı. Sebebi ol, şığarmaşılıqtıñ, sahnanıñ adamı. Biraq, bwl jağday bükil öner adamdarına küye jaqqanmen birdey boldı. Sırttan estigen jwrt, solay eken ğoy dep oylaydı... Biz Elbasınıñ «Ruhani jañğıru» ayasındağı tapsırmaların tastüyin orındap, öner üşin özegi örtenip jürgen azamatımızdı jauğa bermeymiz!

Men, barşa önerge qızmet etip jürgen jandardan osı mäselege bayıppen qaraularıñızdı swraymın. Jerden jeti qoyan tapqanday, jarısa jazıp, jarısa aytıp, süyinşileudiñ qajeti qanşa?!

Ömir bolğan soñ, bwnday paradokstar orın alıp qaladı. Dey twrğanmen, aqtı aq dep, qaranı qara deu parızımız. «Jañılmaytın jaq, sürinbeytin twyaq joq» - deydi... Biraq, jaqsı azamattı  jağınan jañıldırğan, tegis jerde ayağınan sürindirgen kim? Bwl mäseleniñ sebep pen saldarına salmaqtılıqpen, salqınqandılıqpen  qarağan jön. İstiñ mänisine barmay jatıp, ayğay-attandap, Önerge, teatr tarihına küye jağıp,  el arasına iritki saludıñ tükke qajeti joq!

Asanäli Äşimov,

Qazaqstan Teatrları Associaciyasınıñ Prezidenti, Qazaqstannıñ Eñbek Eri, KSRO jäne Qazaqstannıñ halıq artisi

Abai.kz

12 pikir