Jeksenbi, 27 Mamır 2018
Mäñgilik el 1472 2 pikir 6 Aqpan, 2018 sağat 08:39

Vice-ministr: Biz qaşan da aşıq swhbat beruge dayınbız

QR Auıl şaruaşılığı vice-ministri Erlan Nısanbaev OKQ-da ötken baspasöz mäslihatında Parlament Mäjilisiniñ qarauında jatqan jer qatınastarın retteu boyınşa zañ jobasın tüsindirip berdi.

«Özderiñizge belgili, 2016 jıldıñ mamır ayında Elbasınıñ Jarlığımen Jer kodeksiniñ jekelegen normalarına 2021 jıldıñ 31 jeltoqsanına deyin moratoriy engizildi. Atap aytqanda, auıl şaruaşılığı maqsatındağı jerlerdi qazaqstandıqtarğa jeke menşikke, şeteldikterge beruge müldem tıyım salındı. Bwl rette Parlament deputattarınıñ ortalıq uäkiletti organdarı, qoğam qayratkerleri men azamattıq qoğam belsendileriniñ qatısuımen arnayı jer reforması boyınşa komissiya qwrılıp, tiisti jwmıstar atqarıldı», - deydi vice-ministr.

Erlan Nısanbaev komissiya müşeleri kelesi şeşimderdi qabıldağanın atap ötti.

«Birinşi auıl şaruaşılığı jerlerin qazaqstandıqtarğa jalğa beru normasın saqtau jäne jetildiru. Ekinşiden, qazaqstandıqarğa auıl şaruaşılığı jerlerin jalğa beru mölşerin şekteu. Üşinşi şekara aumaqtarındağı auıl şaruaşılığı jerlerin paydalanu talaptarın küşeytu. Törtinşi twrğındardıñ jayılım alqaptarına degen qajettiligin qamtamasız etu. Atalğan wsınıstardıñ negizinde Jer kodeksine özgerister men tolıqtırular engizu boyınşa zañ jobası dayındalıp, Parlament Mäjilisiniñ qarauına engizildi», - deydi ol.

Vice-ministrdiñ aytuınşa, zañ jobası qoğamdıq keñes otırıstarında, basqa da qoğamdıq alañdarda jwrtşılıqpen, auıl şaruaşılığınıñ tauarın öndiruşilerimen keñinen talqılanğan.

«Birinşiden, auıl şaruaşılığı jerlerin qazaqstandıqtarğa jalğa beru normasın saqtau jäne jetildiru maqsatında jalğa berudiñ jaña  tärtibi qarastırılıp otır. Jer beru tärtibiniñ aşıqtığı men ayqındılığın qamtamasız etu jäne jemqorlıqtı boldırmau üşin konkursqa qoyılatın jerler tizbesin bekitu, onı mindetti türde qoğamdıq keñester men ÜEW-men kelisu, jer komissiyasınıñ qwramına 50 payızın qoğamdıq keñes pen wyımdardıñ ökilderin engizu qarastırılğan. Sonımen birge, konkurstıñ jariyalılığı men oğan barlıq qatısuşılardıñ teñ qol jetkizuin qamtamasız etu üşin jaña tärtip boyınşa konkurstıñ ötkiziletini turalı habarlandırudı tek audandıq ğana emes, basqa da BAQ, AŞM ministrligi men äkimdikterdiñ resmi internet-resurstarında ornalastırıladı», - deydi vice-ministr.

Erlan Nısanbaev ekinşiden auıl şaruaşılığı jerlerin ülken kölemde bir qolğa beriluin boldırmau maqsatı közdelgenin tilge tiek etti.

«Bir qolğa beriletin jerlerdiñ mölşerin mäslihattar men äkimdikterdiñ birlesken wsınıstarı negizinde Ükimetpen bekitiledi. Bwl şekti mölşerdi ayqındau üşin tiisti esepteu ädistemesi äzirlengen. Üşinşi - memlekettik şekaranıñ şekaralıq beldeuindegi auıl şaruaşılığı alqaptarı eşkimge berilmeydi. Tek jergilikti halıqqa jayılım, şabındıq maqsatında paydalanuğa rwqsat beriledi. Şekaralıq aumaqta ornalasqan jer uçaskelerin şeteldikterge, QR-nıñ şeteldiktermen nekege twrğan azamattarına nemese QR-nıñ qwramında şeteldikteri bar zañdı twlğalarına beruge tıyım salınadı. Bwl aumaqta ornalasqan auıl şaruaşılığı jerleri tek qazaqstandıqtarğa jalğa beriletin boladı», - deydi Erlan Nısanbaev.

Vice-ministr sonımen qatar, törtinşiden jergilikti twrğındardıñ jeke auılı ornalasqan auıl şaruaşılığı jerleri tek qazaqstandıqtarğa ğana jalğa beriletinin atap ötti. Onıñ sözine süyensek, jergilikti twrğındardıñ jeke auılındağı malınıñ sanı jıl sayın ösuine baylanıstı zañ jobasımen jayılım jetispeuşiligin şeşu maqsatında eldimekender aynalasında jayılım alañdarın ayqındaudıñ norması közdelgen. Osı maqsatta ayqındalğan jayılımdardı QR jeke jäne zañdı twlğalarına jalğa beruge tıyım salınadı.

Vice-ministr eldimekenderdiñ mañındağı jayılımdardıñ köbi jeke jäne zañdı twlğalarğa berilip ketkenin eskerip, äkimdikterge ol jerlerdi qayta halıqtıñ jayılım mwqtajdığı üşin memlekettik qajettikke jatqızu qarastırılıp otırğanın aytadı.

«Erekşe nazar audaratın jağday - atalğan normalardan bölek, zañ jobasımen auıl şaruaşılığı jerlerin beruge engizilgen moratoriydiñ şeñberin tek şeteldikterge ğana emes, bir payız bolsa da şeteldik ülesi bar qazaqstandıq zañdı twlğalarğa keñeytu qarastırılıp otır. Bwl rette zañ jobası normalarınıñ barlığı auıl şaruaşılığı jerlerin tek qana qazaqstandıqtarğa berudi közdeydi. Zañ jobasınıñ mätinimen AŞM resmi saytınıñ Jer kodeksi böliminde tanısa alasızdar. Öz kezegimizde biz aşıq swhbat beruge qaşan da dayınbız», - dep tüydi Nısanbaev.

Ayta ketsek, qazirgi uaqıtta QR Parlament Mäjilisinde «Jer qatınastarın retteu mäseleleri boyınşa QR keybir zañnamalıq aktilerine özgerister men tolıqtırular engizu» turalı zañ jobası qaraluda.

Abai.kz

2 pikir