Beysenbi, 26 Säuir 2018
Bolğan oqiğa 1262 3 pikir 16 Naurız, 2018 sağat 10:33

Äskerde jürgen jigitke oq tiip, ölim auzında jatır

Almatı oblısındağı 7552 äskeri böliminiñ sarbazı tün işinde oqqa wşqan. Atılğan 5 oqtıñ üşeui 21 jastağı Ertuğan Omarhanovtıñ basına tiip, qazir ol komada jatır. Bwl turalı KTK telearnası habarladı.

Ertuğan Omarhanov äsker qatarına özi swranıp kelgen. Şığıs Qazaqstan oblısınıñ tuması Zareçnıy kentindegi bölimge qaraşada qabıldanıptı. Al, mwndağı sarbazdar kezek-kezekpen jaqın jerdegi türmeni küzetedi. 2 kün bwrın ol öz beketin tapsırar kezde oqqa wşqan. Tüngi sağat 1 şamasında bolğan oqıs jağdaydıñ män-jayın qayğıdan qan jwtqan ata-ana äli de tüsine alar emes.

Jigittiñ äkesi Erjan Ahmetov wlınıñ äskerge üş ay bwrın ketkenin aytadı. "Wlım äskerge kelip, 3 aydan keyin mına jağday bolıp jatır.  Bilmeymin ne bolğanın, tüsiniksiz. Oq basına, jaqtan kirip bastan şıqqan ğoy", - deydi ol.

Oqtıñ Ertuğannıñ qolındağı Kalaşnikov avtomatınan atılğanı belgili. Onıñ üşeui sarbazğa däl tigen. Sondıqtan, därigerler dereu ota jasaptı. Soğan qaramastan, jigittiñ jağdayı tım auır.

Äskeri bölimdegi kamerağa sarbazdıñ avtomattı oqtap jatqanı tüsipti. Al, atılğan twsı eş jerde joq. Sol kezde qasında birneşe qarulası bolğanımen, olar da mardımdı eşteñe aytpaptı. Sondıqtan, qazir jwmbaq jağdaydıñ boljamdarı ğana aytıluda.

Jaqındarı bolsa Ertuğanğa äskerde qısım körsetilgen dep oylaydı. Söytip, öz-özine qol jwmsauğa itermelegen boluı mümkin. Öytkeni, bwğan deyin anasına qoñırau şalğanda, qinalıp jürgenin jetkizipti.

Al, äskeri bölimdegiler özderine şañ juıtpadı. Mwnda sarbazdarğa "äy" dep te dauıs köterilmeydi dep otır. Sondıqtan, jas jigit oqtı öz-özine abaysızda atıp alğan dep topşılaydı.

Abai.kz

3 pikir