Beysenbi, 26 Säuir 2018
Janayqay 3033 6 pikir 16 Säuir, 2018 sağat 13:17

Äbdirahmanov mırza, Anargülge araşa tüsiñizder!

Bügin ğana Qıtay türmesinde qamauda otırğan belgili ğalım Qalibek Qanjarbaywlı jaylı jazğan edik. Endi mine, tağı bir qızımızdıñ, yağni Qazaqstannıñ zañdı azamatınıñ aydauda jürgendigi jaylı aqpar kelip tüsti.

Bwl – Anargül Mwhtarhan. 1985 jılı 5-qaraşada Qıtayda tuğan. Qazaqstan Respublikasınıñ azamatı. Şığıs Qazaqstan oblısına qarastı Ürjar audanınıñ ortalığındağı Voronkova köşesindegi 84-üyde twrğan. Qazir Qıtaydağı oqu-üyretu lager'inde qamauda jatır.

Bizge Şığıs Qazaqstan oblısı, Ürjan audanınan Ömirhan Däuletbek attı oqırmanımız habarlasıp, Anargüldiñ wstalıp ketkeni jaylı aqparmen bölisken edi.

Ömirhan Däulethan, körşisi:

- Anargüldiñ özi Qazaqstan Respublikasınıñ azamattığın alğan. Büginde tolıqqandı QR azamatı. Bwrın Almatı oblısında, Wzınağaşta twrğan eken. Sol jaqta jürip azamattığın alıptı. Odan küyeuimen ajırasıp ketip, bizdiñ Ürjarğa köşip kelgen. Keyin osında Mwrat Emilbek degen azamatpen köñil qosıp, otau qwrdı. Mwrat degen azamat meniñ körşim. Voronovka köşesindegi 84-üyde twrdı. Anargül Jansügirov köşesi 30-üyde tirkelgen eken. Sol üy öz atında. Keyin Qıtayğa tuıstarına barıp kelmek bolıp, şekaradan ötip ketken. Sol jerde Qıtaydıñ policiyası twtqındağan. Ol jaqta äke-şeşesi, bir siñilisi twratın. Olar qazir Anargülge araşa tüse almay otır.  

Ötkende Qıtaydıñ oqu-üyretu lagerinde bolğan jigittermen kezdeskenbiz. Olar lagerden şığıp, elge kelgen. Sol jigitterdiñ biri Anardı köripti. Tüski seruen kezinde jolığıp qalıptı. Sodan Anar sälem joldap, Qazaqstan biligi özine araşa tüsuin swraptı. Ol Qazaqstan azamatı ğoy. «Osı jaqtan araşa tüssinşi, izdeu salsınşı. Meniñ izdeuşim bolğanda, men de lagerden bosap şığar edim» depti.

Biz Anargüldiñ qalay jäne qaşan twtqındalğandığı jöninde az-kem derek jiıstırdıq. Endi solardı ret-retimen bayandaymız.

Anargül Mwhtarhan. QR Azamatı. Tirkelgen jeri ŞQO Ürjar audanı, Jansügirov köşesi, 30 üy.

Küyeui – Mwrat Emilbek. QHR Azamatı. Iqtiyarhatı bolğan. Tirkeude twrğan jeri ŞQO, Ürjar audanı, Voronovka köşesi, 84 üy.

Ekeuiniñ neke qiğandığı jaylı zañdı qwjat joq. Nekelerin meşitte qiğan. Kuägerler de, neke qiyu toyınan estelik suretter de jetkilikti.

2017 jıldıñ qañtar ayında (şamamen 11-12 qañtarda) Mwrat Emilbek pen Anargül Mwhtarhan otau qwradı. Meşitte neke qidırğan.

2017 jıldıñ kökeginde Anargül Mwhtarhan Qıtaydağı tuıstarına (äke-şeşesi men bir siñilisine) barıp kelmek bolıp, şekaradan ötken. Şekaradan ötken beti Qıtay policiyası Anargüldi twtqındap äketken. Kuägerlerdiñ aytuınşa, Qazir ol Qıtayda oqu-üyretu lagerinde jatır.

2017 jıldıñ şildesinde Anargüldiñ küyeui Mwrat Emilbek qaytıs bolğan. Mwrat qaytıs bolğannan 2 ay ötkende QR Azamattığın berilgendigi turalı qwjattar dayın bolıptı.

Eñ soraqası sol, Qıtayda oqu-üyretu lagerinde jatqan Qazaqstan azamatı Anargül Mwhtarhan öziniñ jesir qalğanın äli estimegen. Ol bizden, bizdiñ bilikten araşa swraydı. Öz eliniñ tolıqqandı azamatşası retinde, böten eldiñ tärbieleu lagerinde jatqan Anargüldiñ jağdayı bizdi de alañdatıp otır.

Tüyin. Qazaq jetimi men jesirin jılatpağan el. Ötken jolı QR Sırtqı ister ministri Qayrat Äbdrahmanov mırzamen Almatıda jolıqqan edik. Alqa-qotan jiında Qayrat Qwdaybergenwlı, Qıtayda türli sebeppen sayasi qısım körip, qudalauğa tüsip jatqan qandastardıñ jayın söz etken. Qazaqstannıñ Sırtqı ister ministrligi ärbir azamatımızdıñ artınan swrau salıp jatqanın aytqan edi, sol kezde.

Endeşe, twp-tura 1 jıldan beri Qıtaydıñ tärbieleu lagerinde jatqan QR Azamatı Anargül Mwhtarhandı elge qaytaru, Sırtqı ister ministrliginiñ qwzırındağı jwmıs emes pe?!

Bir sözinde Qayrat Äbdirahmanov mırza bılay degen edi: «Qıtay eliniñ azamatı bolsa, basqa eldiñ işki sayasatına aralasuğa mümkinşiligimiz joq. Biraq diplomatiyalıq arnalar arqılı biz olarmen tığız baylanıstamız».

Iä, Qıtaydıñ azamatı bolsa bir basqa. Biraq, Anargül Qazaqstan azamatı. El aman, jwrt tınışta adamımızdı ajdahanıñ aranına tastap qoyıp, qol qusırıp otırğanımız eldigimizge sın! Kerek bolsa, Siz basqarıp otırğan ministrlikke sın, Qayrat Qwdaybergenwlı! Anargülge araşa tüsiñizder!

Nwrgeldi Äbdiğaniwlı

Abai.kz

6 pikir