سەيسەنبى, 16 قاڭتار 2018
371 1 پىكىر 12 قاڭتار, 2018 ساعات 12:20

ساۋد ارابياسى جالعىز تۋريست ايەلدەرگە ۆيزا بەرە باستايدى

ساۋد ارابياسىنىڭ بيلىگى ەر ادامسىز، جالعىز ءوزى ساپارلايتىن 25 جاستان اسقان ايەل تۋريستەرگە ۆيزا بەرە باستايدى. جاڭا ەرەجە 2018 جىلدىڭ العاشقى توقسانىندا جۇمىس ىستەي باستايدى. ءبىر مارتەلىك ۆيزا 30 كۇنگە دەيىن مەرزىمگە بەرىلەدى.

بۇعان دەيىن ايەلدەر تۋىسقان ەر ازاماتسىز ساۋد ارابياسىنا كىرە المايتىن. ەندى بۇل تىيىم 25 جاسقا تولماعاندارعا عانا جۇرەدى.

ساۋد ارابياسىنىڭ تۋريزم جونىندەگى مەملەكەتتىك كوميسسياسىنىڭ حابارلاۋىنشا، جاڭا ەرەجە ەلگە ساياحاتتاۋشىلاردى تارتۋ ماقساتىندا ەنگىزىلگەن.

ساۋد ارابياسىندا بىرنەشە ايدان بەرى رەفورما ءجۇرىپ جاتىر. ونى تاق مۇراگەرى حانزادا موحاممەد بين سالمان جۇرگىزىپ وتىر. قازان ايىندا ايەلدەر اۆتوكولىك جۇرگىزۋگە جانە ءوز ەركىمەن قوعامدىق ورىندارعا بارۋعا مۇمكىندىك الدى. سونىمەن بىرگە ەلدە كونتسەرت جانە باسقا دا ويىن-ساۋىق شارالارىن جاساۋعا بولادى.

وتكەن جىلدىڭ اياعىندا ەلدە 35 جىل ۇزىلىستەن سوڭ كينوتەاترلار اشىلاتىنى بەلگىلى بولدى. بيلىك وسى رەفورما ارقىلى مۇنايعا تاۋەلدى ەكونوميكاسىن ديۆەرسيفيكاتسيالاعىسى كەلەدى.

Abai.kz

1 پىكىر