جۇما, 25 مامىر 2018
اقيقاتقا قيانات 1430 49 پىكىر 10 اقپان, 2018 ساعات 18:44

«باقاۋوۆ ەل مەن ەلباسىنىڭ سەنىمىن اقتاي الدى ما» اتتى ماقالاعا تەرىستەمە

قۇرمەتتى Abai.kz اقپاراتتىق پورتالى! ءشارىپحان قايسار ەسىمدى ءجۋرناليستىڭ  وزدىگىمەن تون ءپىشىپ، ەلباسى نۇرسۇلتان ءابىشۇلى سەنىم ارتىپ، 2016 جىلعى 25 ناۋرىزدا وبلىس باسشىلىعىنا تاعايىنداعان پاۆلودار وبلىسىنىڭ اكىمى بولات جۇمابەكۇلى باقاۋوۆتىڭ ەل الدىنداعى ابىرويى مەن بەدەلىنە نۇقسان كەلتىرەتىن سوزدەرمەن جازىلعان ماقالاعا تەرىستەمە بەرۋىڭىزدى سۇرايمىز.

ءسوزىمىز دايەكتى بولۋ ءۇشىن ماقالادا ايتىلعان ءار سىن پىكىرگە ءوزىمىزدىڭ قارسى ءۋاجىمىزدى كەلتىرسەك. ءشارىپحان قايسار جازىپ وتىرعان وتكەن جىلعى ستاليندىك قۋعىن-سۇرگىن جانە اشارشىلىق قۇرباندارىن ەسكە الۋعا ارنالعان جيىندا ايماق باسشىسى قازاق جانە ورىس تىلدەرىندە سويلەدى. ياعني، اۆتوردىڭ «ايماق باسشىسى كورشى ەلدىڭ مەملەكەتتىك تىلىندە سويلەدى» دەگەنى شىندىققا جاناسپايدى. ءسوزىن انا تىلىمىزدە باستاعان بولات جۇمابەكۇلى ستاليندىك قۋعىن-سۇرگىن قۇرباندارىنا قۇران باعىشتاۋعا رۇقسات بەرگەن جوق دەگەنىنە ايتارىمىز. ءسىز وسى ماقالانىڭ استىندا پىكىر جازعان، سول شارادا بولىپ، ءبارىن ءوز كوزىمەن كورگەن قر جازۋشىلار وداعىنىڭ مۇشەسى، جازۋشىلار وداعىنىڭ جەرگىلىكتى فيليالىنىڭ توراعاسى، اقىن، قوعام قايراتكەرى، حالىقارالىق «الاش» سىيلىعىنىڭ لاۋرەاتى قاني ارمان باقتانۇلىنىڭ جازعانىن وقىعان بولارسىزدار. وقىماساڭىزدار، حاتىمىزدا كەلتىرۋ ارتىق ەتپەس.  ارمان قاني 2018-02-08 12:54:39 «ءشارىپحان قايسار مىرزا، بىلتىر بولات باقاۋوۆ ارۋاقتارعا قۇران باعىشتاتپادى دەگەن ءسوزىڭىز شىندىقپەن مۇلدە سايكەسپەيدى. شىندىعىندا، بىلتىر وبلىس يمامى ناريمان قاجى جانە قۋعىن-سۇرگىن قۇرباندارىن ەسكە الۋ كۇنى وقا-دان كەرەكۋگە ارنايى كەلگەن قۇربانالى سوپى ارۋاقتارعا قۇران باعىشتادى، مۇنى ءسىز بىلمەيتىن شىعارسىز. ودان ارعى جىلى وبلىستىڭ ورتالىق مەشىتىندە ارۋاقتارعا قۇران وقىلىپ، اس بەرىلگەنىنەن دە حابارسىز بولارسىز. كەزىندە بۇل جونىندەگى اقپاراتتار فەيسبۋكتە جاريالاندى. قاجەت ەتسەڭىز، سوندا تۇسىرىلگەن فوتولاردى سىزگە جىبەرەيىن». ەل سىيلاعان ارداقتى اعامىز، اقيقاتتى جىرلاعان اقىننىڭ سوزىنەن ارتىق دالەل جوق شىعار.

رۋزا زايكەنقىزى بەيسەنبايتەگىمەن بولعان جاعدايعا كەلەتىن بولساق، ول اپايىمىز ترامۆايدا مەملەكەتتىك تىلدە حابارلاندىرۋ جاسالمادى دەپ داۋ شىعارعانىنا قاتىستى وقيعانى ءتۇسىندىرىپ وتەيىك.  وبلىس ورتالىعىنداعى، ەكىباستۇز، اقسۋ مونوقالالارىنادعى قوعامدىق كولىكتەردىڭ بارىندە، ترامۆاي نەمەسە اۆتوبۋس بولسىن، ايالدامالاردىڭ اتاۋلارى مەن ءتۇرلى حابارلاندىرۋلار اۆتوماتتى تۇردە ەكى تىلدە حابارلانادى. رۋزا زايكەنقىزى ۇلتى ورىس كوندۋكتورعا انا تىلىمىزدە سۇراق قويىپ، وعان جاۋاپ الماعان سوڭ ترامۆايدىڭ الدىنا شىعىپ تۇرىپ العان. جول كەپتەلىسىن جاساپ،، ترامۆاي جولاۋشىلارىنىڭ اشۋ-ىزاسىن تۋدىرعان رۋزا بەيسەنبايتەگىن وقيعا ورنىنا ترامۆاي جۇرگىزۋشىسى قوڭىراۋ شالعاننان كەيىن كەلگەن قالالىق جەرگىلىكتى پوليتسيا وكىلدەرى ەكى تاراپتان تۇسىنىكتەمە الىپ، رۋزا زايكەنقىزىنىڭ ىسىندە قۇقىق بۇزۋشىلىق قۇرامى جوق دەپ تاۋىپ، ونى بوساتىپ جىبەرەدى.

ايتپاعىمىز، وبلىستا تۇرعىنداردى مەملەكەتتىك تىلگە وقىتۋ، ولاردىڭ تىلدىك قورىن بايىتۋ، ءوزارا سويلەسۋ داعدىلارىن جەتىلدىرۋ ماقساتىندا ارانيى كۋرستار وتكىزىلەدى. كۋرستارعا وبلىسىمىزداعى ءتىلدى ۇيرەنگىسى كەلەتىن كەز كەلگەن ازامات  جازىلا الادى. كۋرس تىڭداۋشىلارى ءۇشىن وقىتۋ تەگىن. ماسەلەن، 2017 جىلى وبلىس بويىنشا 10570 ادام مەملەكەتتىك تىلگە وقىتۋ كۋرستارىنان ءوتتى. ولاردىڭ 6532-ءسى وزگە ۇلت وكىلدەرى. مەملەكەتتىك ءتىلدى ۇيرەتۋ جانە جاڭاشا ۇلگىدە ناسيحاتتاۋ، سونداي-اق قازاق ءتىلىن ۇيرەنۋگە نيەتى بار ادامدار ءۇشىن تىلدىك ورتا قالىپتاستىرۋ ماقساتىنداعى تىلدىك-تۋريستىك-مادەني باعىتتاعى ەرەكشە جوبا «ءتىل كەرۋەنى» قازاق حالقىنىڭ ادەت-عۇرپى مەن سالت-ءداستۇرىن زەرتتەۋگە ىقپال ەتەتىن قازاقشا كيىز ۇيلەردە ءداستۇرلى ەمەس تۇردە وتكىزىلدى. تورايعىر كولىىنڭ جاعاسىندا وتكەن «ءتىل كەرۋەنى» جوباسىنا بولات جۇمابەكۇلى ءوزى دە قاتىسىپ، ۇلتتىق ءداستۇرىمىزدىڭ ۇلىقتالۋىنا، وزگە ۇلت وكىولدەرىنىڭ مەملەكەتتىك ءتىلدى ۇيرەنۋگە دەگەن ىقىلاسىن كۇشەيتۋگە سەپتىىگن تيگىزدى.

ماقالا اۆتورى جازىپ وتىرعان وبلىس باسشىلارىنىڭ رەيتينگىنە كەلەتىن بولساق، «Sayasat.org» اقپاراتتىق پورتالى جاساعان رەيتينگ قورىتىندىسى بويىنشا وبلىس اكىمىنىڭ جۇمىسىنا قاتىستى سىن پىكىرلەرمەن قاتار، وڭ وزگەرىستەردى دە كەلتىرىلەدى. ماسەلەن، بۇعان دەيىنگى باسشىلار شەشە الماي كەلگەن اۋىلدىق ايماقتاردى سۋمەن قامتۋ ماسەلەسى وڭ شەشىمىن تاپتى. ياعني، رەسپۋبليكالىق بيۋدجەتتەن قوماقتى قاراجات ءبولىنىپ، الداعى ءۇش جىل ىشىندە وبلىستاعى اۋىلدىق ايماقتاردىڭ 50 پايىزى ساپالى اۋىز سۋمەن قامتىلاتىن بولادى.

ايماق باسشىسى وڭتۇستىك كورەيانىڭ پۋسان قالاسىنان كەلگەن دونگ-ا ۋنيۆەرسيتەتىنىڭ جانىنداعى اۋرۋحااننىڭ ديرەكتورىمەن مەموراندۋم جاساپ، ايماقتا جاڭا دياگنوستكيالىق ورتالىق اشىلاتىن بولدى. بۇدان بولەك، بولات جۇمابەكۇلى ءماجىلىس دەپۋتاتتارىمەن  جۇرگىزگەن كەلىسسوزدەردىڭ ناتيجەسىندە رەسپۋبليكالىق بيۋدجەتتەن 4 ميللياردقا جۋىق قارجى ءبولىنىپ، ۇزاق جىلدار بويى ەسكى ءارى تار عيماراتتا جۇمىس ىستەپ كەلگەن ونكولوگيالىق ديسپانسەردىڭ جاڭا عيماراتىنىڭ قۇرىلىسى باستالىپ كەتتى. ساۋالناماعا قاتىسقان رەسپوندەنتتەر وبلىس ورتالىعىنا جاڭا ترامۆايلاردى جەتكىزۋدەگى بەلورۋستىق ارىپتەستەرمەن اراداعى قاتىناستار بويىنشا بولات جۇمابەكۇلىنىڭ تاباندىلىعىن دا اتاپ وتكەن.

ءشارىپحان قايساردىڭ سولتۇستىك وڭىردەگى، ونىڭ ىشىندە پاۆلودار وبلىسىنداعى، مەملەكەتتىلىگىمىزدىڭ تۇتاستىعىنا الاڭداۋىنا ەش نەگىز جوق. ەلباسىنىڭ تىكەلەي باستاماسىمەن 1995 جىلى قۇرىلعان قازاقستان حالقى اسسامبلەياسىنىڭ وبلىستىق فيليالى وڭىرىمىزدەگى حالىقتار دوستىعى، وتاندىق ءپاتريوتيزمدى دامىتۋ بويىنشا كوپتەگەن كەلەلى ءىس-شارالار اتقارىلدى. ايماعىمىزداعى ءتۇرلى ۇلت وكىلدەرى قازاق حالقىنىڭ قيىن-قىستاۋ كەزدە ولارعا قول ۇشىن سوزعان جاقسىلىعىن ءاردايىم ايتىپ جۇرەدى. ستاليندىك قۋعىن-سۇرگىن كەزىندە وڭىرىمىزگە جەر اۋدارىلعان كارىس، شەشەن-ينگۋش، نەمىس جانە وزگە دە ۇلت وكىلدەرى ۇلتتىق جاڭعىرۋ مەكتەبىندە وزدەرىنىڭ انا تىلىمەن قاتار قازاق ءتىلىن دە وقىپ، مەملەكەتتىك ءتىلدىڭ مارتەبەسىن ءوسىرىپ كەلەدى. ماسەلەن، 2014 جىلى ۇلتى ورىس باباكوۆا انجەليكا اتتى قىزىمىز رەسپۋبليكالىق «اباي وقۋلارى » بايقاۋىندا باس جۇلدەنى جەڭىپ الدى. بۇدان بولەك، وڭىرىمىزدە مەملەكەتتىك ءتىلدى اۆتوحتوندى ۇلت وكىلدەرىنەن ارتىق بىلمەسە، كەم بىلمەيتىن فيلولوگيا عىلىمدارىنىڭ دوكتورى ۆلاديمير شنايدەر، «ەرتىس-تۆ» وبلىستىق ارناسىنىڭ ديكتورى مارينا ساحاروۆا، اسسامبلەيا فيليالىنىڭ جاستارمەن جۇمىس ءبولىمىنىڭ باسشىسى ەلينا پاۋلي بار.

جەر-سۋ اتاۋلارىنىڭ قازاقشالانۋىنا بايلانىستى ايتارىمىز، 2016 جىلى بولات جۇمابەكۇلىنىڭ تىكەلەي باستاماسىمەن وبلىس ورتالىعىنداعى قانقۇيلى رەۆوليۋتسيونەر تەرەنتي دەريباستىڭ اتىنداعى كوشە داڭقتى جەرلەسىمىز، كەڭەس وداعىنىڭ باتىرى، تەحنيكالىق عىلىمداردىڭ كانديداتى، پەداگوگ-ۇستاز قۇدايبەرگەن ماعزۇمۇلى سۇراعانوۆتىڭ اتىنا بەرىلدى. وتكەن جىلى وبلىس ورتالىعىنداعى لەنين كوشەسىنىڭ اتاۋىن استانا قالاسى دەپ اۋىستىرۋ تۋرالى ۇسىنىس ءتۇسىپ، حالىقتىڭ قولداۋىنا يە بولدى. بۇدان بولەك، وبلىس بويىنشا كوشەنىڭ اتاۋى كەڭەستىك داۋىردەگى سوۆەتسكايا، تسەليننايا، 70 لەت وكتيابريا سياقتى ەسكىلىكتى اتاۋلاردان قۇتىلىپ، ولارعا قازاعىمىزدىڭ باعىنا تۋعان اتاقتى ۇل-قىزدارى: وڭىرىمىزدەن شىققان باتىرلار، جالپىۇلتتىق قاھارمانداردىڭ ەسىمدەرى، دوستىق پەن بىرلىكتىڭ ۇعىمىن بىلدىرەتىن بايتەرەك، استانا، بەيبىتشىلىك، اتامەكەن سياقتى اتاۋلار بەرىلدى.

قايسارحاننىڭ «بولات باقاۋوۆ باياناۋىل جۇرتىنىڭ  رۋحىن سىندىردى» دەگەنى ەش دايەككە نەگىزدەلمەگەن وتىرىك ءسوز. بولات جۇمابەكۇلى 2017 جىلى قاسيەتتى ولكە، جاسىباي مەن ولجاباي، بۇقار جىراۋ مەن اۋليە ءماشھۇر ءجۇسىپ، جاياۋ مۇسا مەن جۇسىپبەك، قانىش پەن الكەي سىندى قازاقتىڭ باتىرلارى مەن انشىلەرى، اقىندارى مەن عالىمدارى دۇنيەگە كەلگەن باياناۋىل اۋدانىنىڭ دامۋىنا 5 ميلليارد تەڭگە كولەمىندە قاراجات ءبولىپ، اۋدان ورتالىعى مەن اۋىلداردى كوركەيتۋگە كوپ كۇش جۇمسادى. اۋدان ورتالىعىنا سۋ قۇبىرلارى تارتىلىپ، شاعىن فۋتبول الاڭى سالىندى. كوشەلەرگە اسفالت جول مەن تاس تروتۋارلار توسەلدى. الاشتىڭ ۇرانىن جازعان وتتى اقىن سۇلتانماحمۇت تورايعىروۆتىڭ تۋعان اۋىلى تورايعىردا اۋىل كلۋبىنا كۇردەلى جوندەۋ جۇمىسى جۇرگىزىلدى. اۋىل بالالارىنىڭ سپورتپەن شۇعىلدانۋى ءۇشىن شاعىن فۋتبول الاڭى سالىندى. كوشەلەرگە تۇنگى جارىق شامدارى ورناتىلدى. قايسارحان ءشارىپ وسىنىڭ ءبارىن  ءوز كوزىمەن كورسە، بولات باقاۋوۆ باياناۋىلدىقتاردىڭ رۋحىن سىندىردى دەپ ەمەس، كەرىسىنشە، ولاردىڭ رۋحىن اسقاقتاتتى دەپ جازار ەدى.

ماقالا اۆتورى ءوزى بىلمەيتىن ماسەلەنى زەرتتەپ، قاراڭعىدا اداسقان ادام سەكىلدى. وبلىستا «قانشا قازاق مەكتەبىن اشتى» دەپ سۇرايدى. پاۆلودار وبلىسىندا ءار جىلدارى اشىلعان مەكتەپتەردىڭ ءبارى دە مەملەكەتتىك تىلدە ءبىلىم بەرەدى. 2015 جىلى وبلىس ورتالىعىندا №37 مەملەكەتتىك تىلدە ءبىلىم بەرەتىن زاماناۋي مەكتەپ اشىلسا، 2016 جىلى ەكىباستۇز قالاسىندا 1200 ورىندىق №36  قازاق مەكتەپ-ليتسەيى اشىلدى. سونىمەن بىرگە، 2016 جىلى اقسۋ قالاسىنىڭ №9 شاعىن اۋدانىندا بۇلدىرشىندەرگە مەملەكەتتىك تىلدە ءبىلىم بەرەتىن 280 ورىندىق «اينالايىن» بالا باقشاسى پايتسدالانۋعا بەرىلدى. ايماق باسشىسىنىڭ زيالى قاۋىم وكىلدەرىمەن وتكەن كەزدەسۋدە بالا باقشالاردىڭ بارىندە وقىتۋدى قازاق تىلىنە اۋىستىرۋ جونىندەگى ۇسىنىستى شاراعا قاتىسقان اقىن-جازۋشىلار، ونەر يەلەرى، ەل اعالارى قىزۋ قولدادى. وبلىس اكىمىنىڭ ۇسىنىسى قازىرگى ۋاقىتتا وبلىستىق ءبىلىم بەرۋ باسقارماسى تاراپىنان جان-جاقتى زەرتتەلىپ جاتىر. كونستيتۋتسيالىق نورمالارعا سايكەس كەلىپ، وبلىس تۇرعىندارىنىڭ تاراپىنان قولداۋ بولسا، بۇل جوبا پيلوتتىق تۇردە وڭىرىمىزدە ەنگىزىلەتىن بولادى. تۇركىستان اۆتونومياسىن قۇرىپ، ازاتتىق ءۇشىن كۇرەسكەن ازاماتىمىز مۇستافا شوقاي «بالا قاي تىلدە ءبىلىم السا، سول ۇلتقا سول تىلدە قىزمەت ەتەدى» دەگەن ءسوزى بار. بولات جۇمابەكۇلىىنڭ بالا باقشالارداعى وقىتۋدى قازاق تىلىندە جۇرگىزۋدى ۇسىنۋ – ناعىز ۇلتجاندى ازاماتتىڭ، ەل بولاشاعىن ويلاعان باسشىنىڭ ىسىنە جاتادى.

ءشارىپحاننىڭ جازۋى بويىنشا ايماق باسشىسى بولات باقاۋوۆ ءوزىنىڭ تۋعان جەرى ەشتەڭە بىتىرە الماي ءجۇر-مىس. بۇل ەندى، جۋرناليست باۋىرىمىزدىڭ ءبىلىمىنىڭ تايازدىعىن، ماقالانى ءوڭىردىڭ جاعدايىن زەرتتەپ-بىلمەي، ءاتۇتستى جازا سالعانىنىڭ بەلگىسى. «اڭداماي سويلەگەن اۋىرماي ولەدى» دەگەن حالىق دانالىعىن ەستە ۇستاسا، ولاي جازباس  ەدى. بولات جۇمابەكۇلىنىڭ باسشىلىعىمەن وڭىردە كوپتەگەن كەلەلى ىستەر اتقارىلدى. وعان وبلىس جۇرتشىلىعى كۋا. ءبارىن جىپكە ءتىزىپ جازباساق تا، ەڭ ماڭىزدىلارىنا توقتالا كەتەيىك. بولات جۇمابەكۇلى باسشىلىققا كەلگەن ەكى جىل ىشىندە ءوڭىردىڭ جالپى ىشكى ءونىمى بۇعان دەيىنگى ىلدارمەن سالىستىرعاندا ايتارلىقتاي ءوستى. وبلىس اكىمى ەلباسىنىڭ تاپسىرماسى بويىنشا ينۆەستورلارمەن تىكەلەي قارىم-قاتىناس جاساپ، كوپتەگەن شەت ەلدىك قارجى ينستيتۋتتارى مەن جەكە كومپانيالاردىڭ وڭىرگە ينۆەستيتسيا قۇيۋىنا تۇرتكى بولدى. ماسەلەن، وبلىس ورتالىعىنداعى «پاۆلودار» ارنايى ەكونوميكالىق ورتالىعىندا اۆتوموبيل ديسكىلەرىن جاساپ شىعارۋ جانە قوسپالى اليۋميني ءوندىرىسى اشىلدى. اۋىل شارۋاشىلىعى سالاسىندا دا كوپتەگەن ماڭىزدى ىستەر اتقارىلدى. قر ۇكىمەتىنىڭ مەملەكەتتىك باعدارلاماسىنا سايكەس اۋىلدىق ايماقتاردا اۋىل شارۋاشىلىعى كووپەراتيۆتەرىن قۇرۋ ءىسى جوسپاردان ارتىق ورىندالىپ، جەكە شارۋالار مەملەكەتتەن بولىنگەن سۋبسيديالاردىڭ شاراپاتىن كورىپ جاتىر. كووپەراتيۆتەرگە بىرىككەن شارۋالار مەملەكەت قارجىسىنا ءسۇت سالقىنداتۋ قوندىرعىلارىن، اسىل تۇقىمدى قارا مال ساتىپ الىپ، اۋىلدىق جەردە ناۋبايحانا، تىگىن تسەحتارى، شاشتاراز سياقتى كاسىپتەر بويىنشا ءوز بيزنەستەرىن جۇرگىزىپ يگىلىگىنكورىپ جاتىر. مۇنىڭ ءبارى وبلىس باسشىسىنىڭ تىكەلەي باسشىلىعىمەن اتقارىلىپ جاتقاندىقتان بولات جۇمابەكۇلىنىڭ ىسكەرلىگى مەن مەنەدجەرلىك قابىلەتىنىڭ جوعارى ەكەندىگىنە ايعاق.

ماقالا اۆتورى «وڭتۇستىكتە تىعىز قونىستانىپ وتىرعان شارۋالاردى پاۆلودار وبلىسىنا اۋدارۋ ءىسى مۇلدەم جۇرگىزىلمەيدى» دەپ جازىپتى. بۇل دا شىندىقپەن جاناسپايدى. بولات جۇمابەكۇلى اۋدان اكىمدەرىنە، الەۋمەتتىك باعدارلامالار جانە جۇمىسپەن قامتۋ باسقارماسىنىڭ باسشىسىنا تىكەلەي تاپسىرما جىبەرىپ، وڭتۇستىك قازاقستان، جامبىل، الماتى، قىزىلوردا سياقتى تۇرعىندار تىعىز ورنالاسقان ايماقتارعا ىسساپارعا جىبەردى. وسى جۇمىستاردىڭ ناتيجەسىندە  وڭتۇستىكتەگى اعايىندار پاۆلودار وبلىسىنا كوشىپ كەلۋ بويىنشا كەڭەس الدى. وتكەن جىلى پاۆلودار وبلىسىنا وزبەكستاننان، موڭعوليادان، رەسەيدەن، قىتايدان، ۋكراينادان  349  ادام كوشىرىلىپ، ولاردىڭ ءبارى ورالمان ستاتۋسىنا يە بولدى. سونىمەن بىرگە، وڭتۇستىك وڭىرلەردەن 292 ادام كوشىرىلدى. ولاردىڭ ءبارى اۋداندار مەن  اۋىلدىق جەرلەردە قونىستاندىرىلىپ، مەكتەپ جاسىنداعى بالالارى تۇگەلدەي وقۋعا قابىلدانىپ، مەكتەپ جاسىنا دەيىنگى بالالار بالا-باقشامەن قامتىلدى. تۇرعىلىقتى جەرلەرىنە تەزىرەك بەيىمدەلىپ كەتۋلەرىنە جان-جاقتى كومەك كورسەتىلىپ جاتىر. قازاقستان رەسپۋبليكاسىنىڭ زاڭنامالارىنا سايكەس زەينەتاقى جانە باسقا دا الەۋمەتتىك تولەمدەر تولەنۋدە.

بولات جۇمابەكۇلى ۇلتتىق رۋحتى كوتەرىپ، جاستاردىڭ بويىنا وتاندىق پاتريوتيزم سەزىمدەرىن ءسىڭىرۋ ماقساتىندا ەكى جىل قاتارىنان ەرتىس وزەنىنىڭ جاعاسىنداعى كوكوراي القاپتاردا ەتنوفەستۆيال وتكىزۋدى داستۇرگە اينالدىردى. وتكەن جىلى «ۇلى دالا ەلى» فەستيۆالىندە 100-دەن اسا كيىز ءۇي قۇرىلىپ، ۇلتتىق سالت-ءداستۇرىمىز بەن ادەت-عۇرىپتارىمىز ناسيحاتتالدى. ەتنوفەستيۆال بارىسىندا ايماق باسشىسى دۇنيەجۇزىلىك قازاقتار قاۋىمداستىعى توراعاسىنىڭ ورىنباسارى زاۋىتبەك تۇرىسبەكپەن بىرگە قانداس باۋىرلارمەن كەزدەسىپ، ولاردىڭ وتىنىشتەرىن تىڭدادى. ايتىلعان ۇسىنىستار مەن تىلەك-ارىزدار بويىنشا ءتيىستى تاپسىرمالار بەرىپ، ولاردى باقىلاۋدا ۇستادى. جىل سوڭىندا ايماق باسشىسى وبلىس ورتالىعىنا جاقىن ورنالاسقان ولگينكا اۋىلىنداعى قىتايدان كوشىپ كەلگەن ادال حاميتحاننىڭ ۇيىنە باس سۇعىپ، جاي-كۇيىن سۇرادى. بۇدان كەيىن، وبلىس ورتالىعىندا وڭىرىمىزگە كوشىپ كەلگەن قانداس باۋىرلارمەن كەزدەسكەن بولات جۇمابەكۇلى ولارعا الداعى ۋاقىتتا دا قولدان كەلەر كومەك پەن قولداۋىن ايامايتىنىن جەتكىزدى.

ەلباسى سەنىم ارتىپ، پاۆلودار وبلىسىىنڭ باسشىلىعىنا  قويعاندا بولات جۇمابەكۇلىنىڭ ايماقتاعى كاچير اۋدانى، اقسۋ مونوقالاسى، وبلىس ورتالىعىن باسقارۋداعى جارقىن جەتىستىكتەرى مەن ىسكەري قابىلەتتىلىگىن ەسەپكە العانى ايقىن. بولات جۇمابەكۇلى ۇلت كوشباسشىسىنىڭ سەنىمىنىن اقتاپ، «جاس كەلسە ىسكە» دەگەندەي ۇلتتىق قۇرامى جاعىنان سان الۋان، اسا ماڭىزدى يندۋستريا ورتالىعىن شەبەرلىكپەن باسقارىپ وتىر. وعان قازاقستان رەسپۋبليكاسى پرەزيدەنتىنىڭ اتىنان تاپسىرىلاتىن «ەرەن ەڭبەگى ءۇشىن» مەدالى، «وبلىستىڭ دامۋىنا قوسقان ەلەۋلى ۇلەسى ءۇشىن» ءتوس بەلگىسى جانە «قۇرمەت» وردەنىنىڭ بەرىلۋى دالەل.

ماقالا اۆتورى ءوزىنىڭ ءسوز سوڭىندا «باقاۋوۆ ەل مەن ەلباسىنىڭ سەنىمىن اقتاي الدى ما؟» دەگەن ساۋالىنا ءتيىستى جاۋاپ الدى دەپ ويلايمىز. بۇدان بولەك، قايسارحان ءشارىپ الداعى ۋاقىتتا پاۆلودار وبلىسى، جالپى ايماقتىڭ تىنىس-تىرشىلىگى بولسىن، باسقا دا ماڭىزدى الەۋمەتتىك سەكتور بولسىن،  ماقالا جازباق ويى بولسا، الدىمەن ءوڭىردىڭ جاي-كۇيىمەن تانىسىپ، ماتەريالدى ناقتى زەرتتەپ جازسا دەگەن تىلەگىمىز بار.

پاۆلودار وبلىسى اكىمىنىڭ ءباسپاسوز قىزمەتى

Abai.kz

 

 

49 پىكىر