بەيسەنبى, 24 مامىر 2018
520 0 پىكىر 13 اقپان, 2018 ساعات 09:26

وزبەك زيالىلارى پرەزيدەنتتەن ساياسي ەميگرانت مۇحامماد ساليحتىڭ ەلگە ورالۋىن سۇرايدى

وزبەكستاننىڭ تانىمال اقىن-جازۋشىلارى پرەزيدەنت شاۆكات ميرزياەۆتىڭ اتىنا اشىق حات جازىپ، «وزبەكستاننىڭ حالىقتىق قوزعالىسى» ليدەرى ءارى تانىمال اقىن 69 جاستاعى مۇحامماد ساليحتىڭ ەلگە ورالۋىنا كەپىلدىك بەرۋىن سۇرايدى.

اشىق حات Facebook الەۋمەتتىك جەلىسىندە كەڭىنەن تارالدى.

وزبەكستان جازۋشىلار وداعىنىڭ بۇرىنعى ءبىرىنشى حاتشىسى، وزبەك پارلامەنتىنىڭ ەكس-دەپۋتاتى، ەلدە «بىرلىك» دەپ اتالعان ساياسي قوزعالىستىڭ جانە «ەرىك» دەپ اتالاتىن دەموكراتيالىق پارتيانىڭ نەگىزىن قالاعان مۇحامماد ساليح 1992 جىلدان بەرى شەتەلدە تۇرىپ كەلەدى.

«ءبىز ءسىزدىڭ تاعى ءبىر تاريحي شەشىمىڭىز اقىن مۇحامماد ساليحقا قاتىستى بولعانىن قالايمىز. ول 25 جىلدان بەرى وتانىنان جىراقتا ءجۇر. بۇرىنعى رەجيم جۇرگىزگەن بۇرىس ناسيحاتتىڭ سالدارىنان قوعامدا مۇحامماد ساليحقا دەگەن ۇرەي قالىپتاستى. بىراق شىعارماشىل زيالى قاۋىم ونىڭ ۇلى اقىندىعىن ۇمىتقان جوق. مۇحامماد ساليح ءبىرىنشى كەزەكتە اقىن. سوسىن بارىپ ساياساتكەر. ول ەلدىڭ تاۋەلسىزدىگى ءۇشىن ساياساتپەن ارالاسۋىنا تۋرا كەلدى»، – دەلىنگەن اشىق حاتتا.

2017 جىلدىڭ ناۋرىز ايىندا مۇحامماد ساليح ءبىرىنشى رەت پرەزيدەنت ميرزياەۆتىڭ اتىنا اشىق حات جازعان. بىراق وسىدان كەيىن ۇلتتىق قاۋىپسىزدىك قىزمەتى (ۇقق) «ەلدەگى كونستيتۋتسيالىق جۇيەنى كۇشتەپ بۇزباق بولدى» دەگەن ايىپپەن، ونىڭ ۇستىنەن قىلمىستىق ءىس قوزعادى. وسى ىسكە بايلانىستى جۋرناليست بوبومۋرود ابدۋللاەۆ تا تۇتقىندالعان. مۇحامماد ساليح بۇل ايىپتاۋلاردى ۇقق-نىڭ بۇرىنعى باسشىسى رۋستام ينوياتوۆتىڭ ەلگە كىرگىزبەس ءۇشىن، ادەيى جاساپ وتىرعانى دەپ اتاعان.

1993 جىلدىڭ ساۋىرىندە ساليح «مەملەكەتكە ساتقىندىق جاسادى» دەپ ۇستالعان. بىراق حالىقارالىق ۇيىمداردىڭ قىسىمىمەن ول بوستاندىققا شىقتى. وسىدان كەيىن ول تۇركياعا قاشىپ كەتكەن. سودان بەرى ستامبۇلدا تۇرىپ كەلەدى. 1999 جىلى وزبەكستاننىڭ جوعارعى سوتى تاشكەنتتە جارىلىس ۇيىمداستىردى دەگەن ايىپپەن، ۇزاق مەرزىمگە سىرتتاي تۇرمە جازاسىنا كەسكەن.

Abai.kz

0 پىكىر