بەيسەنبى, 26 ءساۋىر 2018
ەل ءىشى... 1168 32 پىكىر 14 ناۋرىز, 2018 ساعات 08:59

وقۋشى ورامالىن شەشپەسە، كەلەسى سىنىپقا كوشىرىلمەيدى

اقتوبە وبلىستىق ءبىلىم باسقارماسى ورامال داۋىنا وراي مەكتەپكە كەلمەي وتىرعان وقۋشىلاردى كەلەسى سىنىپقا كوشىرمەۋى مۇمكىن. 13 ناۋرىز كۇنى وبلىستىق اكىمدىكتە وتكەن ءباسپاسوز ءماسليحاتىندا اقتوبە وبلىستىق ءبىلىم باسقارماسىنىڭ باسشىسى ءلاززات ورازباەۆانىڭ ايتۋىنشا، باسقارما قازىر بۇل ماسەلەگە وراي ءبىلىم مينيسترلىگىمەن كەڭەسىپ جاتىر.

ءلاززات ورازباەۆانىڭ دەرەگىنشە، قازىر وبلىستا "مەكتەپ فورماسىن ساقتاماعاندىقتان" ساباققا قاتىسا الماي وتىرعان 72 بالا بار. ونىڭ باسىم بولىگى اقتوبە قالاسىنداعى ورتا مەكتەپتەردىڭ وقۋشىلارى. اقتوبە وبلىستىق ءبىلىم باسقاراماسى باسشىسى بۇل ماسەلە اسىرەسە العا جانە مۇعالجار اۋداندارىندا وزەكتى ەكەنىن ايتتى.

- 2018 جىلدىڭ قاڭتار ايىنداعى دەرەك بويىنشا، وبلىس مەكتەپتەرىنە ورامال تارتىپ كەلەتىن 340 وقۋشى بار بولاتىن. بۇگىنگە دەيىن 268 وقۋشى ورامالدارىن شەشتى. ورامالىن شەشكىسى كەلمەگەن 32 قىز بالا قونىس اۋىستىرىپ، قازىر الماتى مەن شىمكەنتتە وقىپ ءجۇر، - دەيدى ءلاززات ورازباەۆا.

اقتوبە وبلىستىق ءدىن ىستەرى باسقارماسىنىڭ باسشىسى جولداس قالماعامبەتوۆ مەكتەپ فورماسىن ساقتاماي وتىرعان 72 وقۋشىنىڭ 16-سى عانا باليعات جاسىنا تولعان قىز بالا ەكەنىن ايتادى.

- وسىدان ەكى تاۋلىك بۇرىن اقتوبە وبلىستىق ءدىن ىستەرى باسقارماسىنا ورامال داۋىنا قاتىستى 200-گە جۋىق اتا-انا قول قويعان ۇندەۋ ءتۇستى. وسىعان دەيىن بۇل ۇندەۋ ينتەرنەتتە جاريالانعان بولاتىن. وندا اقتوبەدە ءدىن ۇستانۋشىلارعا قىسىم جاسالىپ جاتقانى تۋرالى ايتىلادى. مەن مۇنىمەن مۇلدەم كەلىسپەيمىن! تاۋەلسىزدىك العان جىلدارى وبلىستا ەكى مەشىت بار بولاتىن. قازىر ولاردىڭ سانى 67-گە جەتتى. ءبىز ەشكىمنىڭ ءدىني نانىم-سەنىمىنە قول سۇققان ەمەسپىز. بىراق زايىرلى مەملەكەتتىڭ وقۋشىسى مەكتەپ قابىرعاسىندا مەكتەپ فورماسىن ساقتاۋعا مىندەتتى، - دەيدى ول.

اقتوبە وبلىسى بويىنشا ءبىلىم سالاسىن باقىلاۋ دەپارتامەنتى باسشىسىنىڭ مىندەتىن اتقارۋشى جانات مۇحامبەتالينانىڭ ايتۋىنشا، وسىعان دەيىن بالاسى مەكتەپ فورماسىن ساقتاماعان 18 اتا-اناعا 5 ايلىق ەسەپتىك كورسەتكىشكە تەڭ (12025 تەڭگە) ايىپپۇل سالىنعان. ايىپپۇلدارىن تولەگەننەن كەيىن بەس اتا-انا بالالارىن مەكتەپكە ورامالسىز جىبەرە باستاعان. دەپارتامەنت بالاسى مەكتەپ فورماسىن ساقتامايتىن تاعى ءۇش ادامنىڭ قۇجاتتارىن تەكسەرىپ جاتىر. ولارعا دا ايىپپۇل سالىنۋى مۇمكىن.

يسلام ءدىني كوزقاراسىن ۇستاناتىن ونداعان اقتوبەلىك اتا-انا وقۋشى قىزدارىنىڭ مەكتەپكە ورامال تاعىپ بارعانىن قالايدى. ولار ءدىني سەنىمگە سايكەس كيىنۋ حاقىلارى بار ەكەنىن، قازاقستان كونستيتۋتسياسىنىڭ ءدىني نانىم-سەنىم بوستاندىعىنا كەپىل بەرەتىنىن ايتادى. ءبىلىم بەرۋ مەكەمەلەرىنىڭ باسشىلارى مەن بيلىك وكىلدەرى وقۋشىلاردىڭ مەكتەپ ىشىندە بىرىڭعاي فورما كيۋى كەرەك ەكەنىنە، مەكتەپ فورماسى تۋرالى ءبىلىم جانە عىلىم مينيسترلىگىنىڭ ارنايى بۇيرىعى مەن ەرەجەسى بەكىتىلگەنىنە نۇسقايدى. جەرگىلىكتى بيلىك ءدىن ۇستاناتىن وقۋشىلاردىڭ مەكتەپتەن تىس جەردە قالاي كيىنسە دە، ءوز ەركىلەرى ەكەنىن ەسكەرتىپ كەلەدى.

مەكتەپتە ورامال تارتۋعا قاتىستى داۋ بيىل قازاقستانننىڭ بىرنەشە وڭىرىندە تۋىنداعان. كەيبىر وبلىستاردا ورامال تارتاتىن وقۋشىلاردى ساباققا كىرگىزبەي قويۋ وقيعالارى دا كەزدەسكەن. ونداعان وقۋشىنىڭ اتا-اناسى ورامال تارتاتىن بالالارىنىڭ مەكتەپكە كىرگىزىلمەۋىنە قاتىستى سوتقا شاعمدانعان. بىراق سوت ءبىلىم جانە عىلىم مينيسترلىگى مەن مەكتەپتىڭ ۇستانىمىن قولداعان.

Abai.kz

32 پىكىر