دۇيسەنبى, 21 مامىر 2018
46 - ءسوز 2047 0 پىكىر 14 مامىر, 2018 ساعات 09:15

"جەتى دۇركىن قىز"

مەنى اعا تۇتىپ جۇرەتىن ءىنىم سىرىن اشتى. ءبىر ارۋعا ولەردەي عاشىق ەكەن. تەك انا قىزى قۇرعىر كەرگىپ جۇرگەن كورىنەدى. مۇنىڭ جاقسى كورەتىنىن بىلگەسىن ءتىپتى اسقاقتاپ شىعا كەلگەن. جاقىندا تۋرا بۇنىڭ كوز الدىندا باسقا ءبىر جىگىتتىڭ كولىگىنە وتىرىپ كەتىپتى. عاشىق جۇرەك سوندا دا جاماندىققا قيار ەمەس: «مۇمكىن، اعاسى شىعار...»

...مەكتەپتە وقىپ جۇرگەنىمدە كورشىنىڭ قىزى قاراماي قويىپ، مەنىڭ دە استان-كەستەن بولعانىم بار. ساباققا ادەتتەگىدەي ءبىزدىڭ ءۇيدىڭ جانىنان ەمەس، باسقا جولمەن كەتىپ بارا جاتقانىن كورگەندە ىشىمە بىرەۋ كىرىپ الىپ، وت جاعىپ جاتقانداي كۇي كەشكەم. بىرەۋگە ايتقىم كەلدى. تەك كىمگە؟ دوسىڭا ايتساڭ، ونىڭ دا دوسى بار... اعا-اپالارىڭا ايتساڭ، كەلەمەج قىلادى. اكەگە ايتۋ دەگەن ءبىزدىڭ ءۇيدىڭ «سالتىندا» جوق نارسە. سوسىن شەشەمە ايتقىم كەلدى. سەبەبى، ول كىسى ون اۋىز سوزگە ءبىر اۋىز سوزبەن جاۋاپ قاتاتىن ادام ەدى. جۇرت سىرتىنان «ۇندەمەس» دەيتىن.

شەشەم الاقانىمەن اۋزىن جاۋىپ، ءبىراز كۇلىپ الدى. ول كىسى وسىلاي ءۇنسىز كۇلەتىن. سوسىن باسىمنان سيپادى: «ءالى تالاي قىزعا عاشىق بولاسىڭ، بالام. «ءبىر جىگىتتىڭ تۇسىندا جەتى دۇركىن قىز وتەر...» — دەگەن اتالارىڭ...».
كەيىن دە تالاي كۇيىپ-جاندىق قوي. بىراق قانشا ورتەنىپ بارا جاتسام دا، جادىمنىڭ ءبىر بۇرىشىندا شەشەم ايتقان «جەتى دۇركىن قىز» تۇراتىن...
سەپ بولا ما دەپ وسى اڭگىمەنى ءبىزدىڭ «ماجنۇنگە» ايتىپ كورىپ ەم، شورشىپ ءتۇستى: «جوق، اعا، وسى قىزدان باسقا ەشكىمنىڭ كەرەگى جوق! ەگەر وعان قولىم جەتپەسە...».

بەۋ، عاشىقتىق، جيىرما جاستا ادامعا نە ايتقىزبايسىڭ، سەن؟! ايتپەسە، قىرىقتان اسقان اعاسىنىڭ دا كەيدە الگى «جەتى دۇركىننىڭ» ءبارى تۇگەل ءوتىپ بولماعانداي الدەنەگە الاڭداي بەرەتىنىن تۇسىنەر ەدى-اۋ، مىنا بالا، ءا؟!

باۋىرجان باباجانۇلىنىڭ Facebook-تەگى پاراقشاسىنان

Abai.kz

0 پىكىر